Esplikasaun detallu konaba Komponente fiziku husi Komputador.

Komponente fiziku ka babain ita bolu ho naran hardware hanesan sasan fiziku husi komputador ida ne'ebe iha ligasaun ba malu no ho nia funsaun ida-idak. Klaru liu mai ita akompana hamutuk esplikasaun hirak tuir mai ne'e:

1. Motherboard.

Hanesan komponente fiziku ida husi komputador ne'ebe importante tamba husi nia ita bele monta komponente sira seluk hanesan Processor, Hard Disk, RAM, Video Card, Sound Card no seluk tan hodi halo ligasaun ba malu hodi nune'e bele ih komunikasaun ba malu entre komponente sira ne'e.

2. Processor.

Karik komputador bele kompara ho ema, processor hanesan kakutak ba ema ne’e. 

Processor ka CPU (Central Processing Unit) mak  komponente komputador ne’ebe nia serbisu atu halo prosesamentu ka ezekuta instrusaun hotu ne'ebe utilijador hatama.

Molok sosa processor ida ita tenke buka hatene uluk, socket processor modelo saida mak ita nia motherboard ne’e iha, karik socket AM2, socket LGA 775, ka seluk tan.

3. RAM.

RAM habadak husi liafuan Random Access Memory, hanesan komponente fiziku husi komputador ida ne’ebe ho nia funsaun atu rai dokumentu provizoriu husi programa ida ne’ebe sei lao hela ka durante ita sei loke hela no dokumentus hirak ne’e bele asesu ho acak ka random. 

Molok ita sosa RAM ida, ita tenke hatene uluk Slot RAM modelo saida mak ita nia motherboard iha, karik SDRAM, DDR, DDR2, DDR3 ka seluk tan.

4. Hard Disk.

Hard Disk hanesan Komponente fiziku ida iha komputador ho funsaun hodi rai dadus Permante. Hard disk ho kapasidade bo’ot  iha ita nia komputador maka ita bele rai dadus barak liutan. 

Molok ita sosa hard disk ita tenke buka hatene interface hard disk modelo saida mak ita nia motherboard iha, karik  IDE, SCSI, SATA, ka seluk tan.

5. Video Card.

Video Card mak komponente fiziku husi Komputador nian ne’ebe ho nia funsaun  atu fo sai resultadu output grafiku ka desenu nian ne'ebe hatudu iha monitor.

Molok atu hola video card, imi tenke buka hatene uluk, slot Video card modelo saida mak ita nia Motherboard ne’e iha, karik slot PCI, AGP, PCI-X, PCI Express no seluk tan.

6. Sound Card.

Sound card mak komponente fiziku husi komputador nian ne’ebe monta iha motherboard ho nia funsaun mak atu kontrola konaba sound ka lian. Se ita rona muzika balun utilija headset ne'ebe liga ba Komputador ida, lian hirak ne'ebe ita rona ne'e maneja husi sound card. 

7. Power Supply.

Power Supply hanesan komponente fiziku ida hotu husi komputador hodi halo manejamentu ba eletrisidade ka ahi molok transfere ba komponente sira iha matherboard.

8. Monitor.

Monitor hanesan komponente fiziku husi komputador ne’ebe ho nia funsaun atu hatudu grafiku ne’ebe fo sai (output) husi video card. Monitor komputador barak ne’ebe iha merkadoria agora dadaun ne’e mak monitor CRT (monitor tabung) no monitor LCD maibe agora dadaun ema barak prefere uza monitor LCD (liu-liu iha edifisiu sira) tamba monitor ida ne’e laos deit ho modelu ne’ebe modernu, maibe mos iha forsa seluk mak poupa espasu no poupa eletrisidade.

 

9. Tekladu (Keyboad).

Keyboard hanesan komponente fiziku husi komputador ho nia funsaun maka fo instrumentu ho maneira hakerek (ketik) ba komputador ida. Alem de  keyboard standard, keyboard komputador agora ne’e iha modelu oin-oin, hanesan keyboard mini, keyboard fleksibel ne’ebe bele lulun, keyboard wireless ne’ebe bele uza bluetooth, no seluk tan.

10. Laho (Mouse).

Mouse hanesa komponente fiziku husi komputador ne’ebe ho nia funsaun atu muda kursor ba mai iha monitor no atu klik butaun ruma hanesan iha aplikasaun ka programa sira ne'ebe ita hakarak atu klik. Mouse mos iha modelu oin-oin, iha mouse standard, mouse ba jogus (gaming), mouse wireless ne’ebe uza Bluetooth, no seluk tan.  

Obrigadu barak ba belun vizitor sira, karik iha sujestaun ka opiniaun balun ne'ebe relevante hodi hadia diak liu tan konteudu refere bele manda ita nia komentariu iha koluna komentariu iha okos... ☺☺☺