3/06/2023 06:02:00 PM
Ola belun le'e nain sira hotu, imi hotu diak kalae? Espera katak imi hotu ho kondisaun diak hodi le'e hela Publikasaun husi Blog ida ne'e. Iha Publikasaun ba loron ohin, mai ho informasaun Teknolojia ne'ebe agora dadaun famoju tebes. Era agora ejiste teknolojia oioin ne'ebe mak Úniku no Kapas tebes hodi ajuda ita ema nia aktividade hotu ho fasil no lais. Iha teknolojia lubuk ne'ebe iha, hau hakarak fahe ho imi teknolojia ne'ebe agora popular tebes ho naran ARTIFICIAL INTELLIGENCE (AI).
- Saida mak Artificial Intelligence (AI) ?
Artificial Intelligence ka Intelijensia Artifisial hanesan Teknolojia Komputador ne'ebe permite komputador hodi Prosesa no Analiza dadus automátiku utilija métodus semiautônomos sira hanesan Machine Learning, Neural Network no métodus sira seluk tan. Nune'e Teknolojia AI halo komputador bele estuda tuir dadus ne'ebe ita fo no sei kria Modelu (Model) ne'ebe sei uja hodi halo Analije, Identifika Padraun sira no foti Desijaun Automatiku.
AI bele sai hanesan mos Kakutak ba Sistema ida nian hodi foti desijaun ne'ebe los liu duke ita ema. Hanesan iha Machine Learning, komputador bele estuda rasik ho algoritmu ne'ebe mak ita define antes hodi bele hetan Regra no Padraun sira husi dadus ne'ebe ita fo. AI mos utilija ba aplikasaun oioin hanesan Asistente Virtual, sistema inteligente sira atu halo deteksaun fraude, sistema klasifikasaun sira, no sira seluk tan. AI mós iha potensial atu hadi'a ita nia maneira servisu, aprende no interasaun hotu ne'ebe ita halo.
- Ezemplu konaba Artificial Intelligence (AI).
Iha ezemplu lubuk ida ne'ebe hau bele hatudu konaba AI mak hanesan:
1. Asistente Virtual : Agora dadaun ejiste ona Asistente Virtual lubuk ida hanesan Siri, Alexa no Google Assistent ne'ebe utilija Natural Language Processing hodi interpreta Lian ne'ebe ita fo no halo Resposta automatiku;
2. Sistema Rekomendasaun : AI utilija iha sistema Rekomendasaun Personal ba Plataforma sira hanesan Netflix no Amazon hodi hatudu konteudu ka Produtu ne'ebe mak posibilidade utilijador ne'e gosta bazeia ba nia aktividade pasadu nian iha sistema refere;
3. Image and speech recognition : AI utilija iha Teknolojia rekonhesimentu Imajem no Lian (Image and speech recognition) hodi permite komputador atu analija no Identifika Imajem no Liafuan ne'ebe ita temi ho nivel akurasaun ne'ebe mak ass;
4. Autonomous vehicles : Kareta Autonomu no mos Transporte autonomu sira seluk tan ne'ebe utilija AI hodi halo prosesamentu dadus husi Sensor no foti desijaun oinsa atu lori transporte ne'e iha ambiente refere.
Ikus nian hau hakarak fo hatene mos katak iha dia 26 de Outubru 2020, hau Realiza hau nia Exame Monografia ho nia Titulu "Klasifikasaun Lian ON no OFF utiliza Machine Learning". Bazeia ba titulu ne'e, ha'u halao peskija konaba oinsa komputador ida bele halo klasifikasaun ba ema nia liafuan ne’ebe nia koalia hanesan Liafuan ON no OFF utilija Algoritmu husi Machine Learning nian ho naran Support Vector Machine (SVM).
Hau hakarak hatudu mos Diagrama ne'ebe hau uja hodi Dezenvolve Sistema refere to'o remata hanesan iha imajem okos.
Peskija ne'e hanesan Traballu ikus mai hau hanesan Estudante Finalista husi UNTL, Departamentu Informatika nian ne'ebe halao estudu Komparativu iha Universidade Gifu, Japaun durante fulan 3 nia laran ho susesu. La haluha agradese mos ba Docente sira ne'ebe mak suporta ona hau iha peskija ida ne'e, hanorin no hatudu dalan mai hau atu bele konese konaba Artificial Intelligence.
Husi Esplikasaun no Ezemplu Artificial Intelligence nian ne'ebe mak hau hatudu ona, espera bele sai hanesan informasaun balun hodi aumenta ita boot sira nia konesimentu diak liu tan.
No ida ne'e mak Publikasaun ba loron ohin nian, karik iha sujestaun ka kritika ruma bele direitamente tau iha koluna komentariu atu hau bele hadia diak liu tan iha Futuru, no karik iha materia ne'ebe ita prefere hakarak hau hakerek iha Blog ida ne'e ho laran kaman bele hakerek iha koluna Komentariu nian. Ikus liu até já.
